يا ضيفة الصدر صدي وانزحي عني
فيني من الوقت والله ما يكفيني
والوقت لو كان بهمومه مغربلني
ما ابوح حتى على ناسٍ تواليني
احاول اسلى واسوي الشعر واغني
والشعر لولا طروقه وش يسليني
يا وقت قلي علامك وش حصل مني
اصفي معك وانت دايم ما تصافيني
اوفيت لك وانت برت وخاب بك ظني
وانا احسب اني مثل ما اوفيك توفيني
عزالله اني معك بالحيل متعني
الى متى وانت يا وقتي معنيني
من واقع المنهج اللي به تعاملني
في كل الاوضاع اشوف انك معاديني
تغير غارات بظروفك وتشغلني
تقول حرب الرغامه بينك وبيني
ان كان قصدك من الميلات تمحني
عزمي صليبٍ ولي شورٍ يقديني
مدام يمناي بالموقف تجملني
بدحمك يا وقت واشمر عن يميني
وان طال عمري وصد الموت وامهلني
لا ازعّل اعداي وافرح محبيني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين