روح الحب

يا (الغالية) قلبي على الراح خوذيه
بأشعر سويداء القلب تنبض بجيبك

وأهديك (روح الحب) بالصدر رشيه
عطره يفوح بريحتك واهتني بك

بالروق اشمك فيه وانتي تشميه
لما اضمك واحضنك وارتمي بك

وأحس بأحضانك شعورا تحسِّيه
ذاك الشعور المارد الي يجيبك

ويجيبني لك بالهوى لو طلبتيه
بلا شعوره ؛ طايرٍ ؛ ويْهَذي بك

دامي حبيبك انسي اللي عرفتيه
لا تذكرينه يوم.. دامي حبيبك

وأحب واعشق كل شيء تحبيه
ولا اشوف شيء يا حياتي يعيبك

هواي ؛ في هواك باللي تريديه
دام الغلاء يا (الغالية) من نصيبك

وهناي ؛ يأخذ من حروفك تهانيه
وذوقي على ذوقك وطيبي بطيبك

وأقول للعاذل: ترا العذل ما أبيه
وقلبي ؛ ترا يا عاذلي ما دري بك

القلب ؛ يعرف من يحبه ويغليه
ومن يرتضي بي غير من يرتضي بك

والادمي تسمو بذاته معانيه
ما دام تعرف داك تعرف طبيبك

قلبك دليك والمشاعر تغذيه
سيبك من الي بالمشاعر يريبك

والأمر عند الله على الناس مخفيه
صعبٍ ؛ تعرف (الخافي) الي يصيبك