مثل الكتاب - خالد الهدباني

من عاب بالأجواد زوراً وبهتان
لابد ما ترجع عليه المعابه

ومدحً بلا فعل وشواهد وبرهان
مثل صلاة اللي عليه الجنابه

و رجلٍ ما غير بشكل و هدوم ولسان
سيفٍ بلا شذره جميلٍ نصابه

وبيتٍ مبانيّه على غير سيسان
خرابه .. وما تحط وسطه خرابه

و عدو ربعه بالنمايم والإفتان
خبلٍ يولّع جمرته في ثيابه

ومن لا وضع هرجه على كف ميزان
ما له مع الأجواد قدر و مهابه

والصبر زين إلا بمهونه و حقران
صبرٍ على الحقران ما منه ثابه

ومن لا خذا قسمه من هموم و أحزان
مثل الكتاب اللي بليّا كتابه

و أوراقه البيضاء تنبي بنقصان
لو عاش عمر شعيب مابه لبّابه

و ترى حياتك للتجاريب ميدان
والوقت لو تأمنْه .. كشّر بنابه

وترى الخطا وارد ومن طبع الانسان
و لولا الخطا .. محدٍ يعرف إجتنابه

إنشد وتلقى العلم من راس شيبان
نصايح الشايب .. خطايا شبابه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر