إحشم ولد عمك - خالد الهدباني

الله من قلبٍ طواريه تشحنْه
كنّه من الهوجاس في بطن صاجه

والنار واهجها على ايسرْه و أيمنْه
وكن الضلوع اللي تحوفه سياجه

لا جاتك العوجا من إنسان تضمنْه
تصير كالمدلج بليّا سراجه

ما يأتي لظهر البنادم ويطعنْه
إلا الضعيف اللي ما يقدر يواجه

ياكثر ما جاني من الربع و أدفنْه
من خوف لا يظهر للأجناب حاجه

وأنشر ثناهم كل فترة و أبيّنْه
والسب ما يوم إنتهجنا نهاجه

وصية الشايب عسى الخلد مسكنْه
حذرا تراد اللي يلج .. ب لجاجه

وإحشم ولد عمك إذا سولفوا عنْه
لو هو على شوفك يعقد حجاجه

خشمك تراه بوجهك و قطعةٍ منْه
حتى لو إن الخشم فيه إنعواجه

خذ ظاهره وإترك مايخفي و يبطنْه
حتى يجي للخافيات إنبلاجه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر