حب الثناء والمدح

مال الشعر من هامة الراس للساس
لين انحنى راسه وصار متمايل

حاسو يابو عارف مباديه وانحاس
حايل وسْط بيشه وبيشه بحايل

عقب ازدهاره موشك حدود الافلاس
سود الليالي فيه مثل القوايل

صار الشعر سلعه لتمويل الاكياس
سامج وكثرت للهياط الوسايل

شعر الهيط والكرخ ومفاخر الناس
مع اللاسف ليته براع الفعايل

اشوف لي ناسٍ بها نوع وسواس
يشره على مدحه بليّا جمايل

وحب الثناء والمدح ومنافخ الراس
يعطي على نقص الرجوله دلايل

نوماسكم هذا على غير نوماس
اظيفر الباشق لفار الخمايل

ياهل الشعر جمهوركم صابه الياس
وين النوادر وين جزل المثايل

اشفق على حروفن بها فن واحساس
أشفق من البيدا لوبل المخايل

من شاعرٍ نظمه مثل عقد الالماس
يا ركّب المعنى بيوته جزايل