العذارى طامعاتٍ في القصايد / ووالله ليبطن ما جاهن قصيده - يوسف بن محسن العضياني

العذارى طامعاتٍ في القصايد
          ووالله ليبطن ما جاهن قصيده
القصيد لمهرةٍ  تزهى القلايد
              درةٍ بأوصافها الندّر فريده
عذبةٍ فيها الحلا والملح زايد
          والجمال بعقلها الكامل تزيده
مثلها ما شفت في كل البدايد
          كنّها لاجات في جمع  الوحيده
مالها بالزين في عيني ندايد
       ولالها من صغر في قلبي نديده
بنت قومٍ  فعلهم فارق وكايد
           وأكثر العربان منهجهم يكيده
في الليال المذهلات إلهم عوايد
     يحتمون الجيش في حضرة عقيده
لابةٍ وقفاتهم تجلا النكايد
         والكرم من مدهم ياخذ رصيده
هي وفاء والقلب يمتها محايد
        وهي لمغليها عن العالم محيده
مالحقني في محبتها نقايد
         والكلام لبعض الاشكال البليده
© 2023 - موقع الشعر