أجزاء شعري - أحمد الأسلمي

دفنت في وجه الزمن جملة أسرار
و قفّلت مكنوني ولا فاد صبري

دنياي تبحر بي على شط الأمرار
غريق أحاول إنقذ أركان فكري

كنت الصغير اللي حياته بالأوكار
وصرت الكبير اللي بالأدماس يسري

أمشي وأقول إني على الغبن صبار
عايش ولكني على أطراف قبري

شلت الهموم اللي كما ضلع سنجار
و ينبيك عن كثر التناهيت صدري

منظر حزين و يرسمه ناس ً اكثار
واللي يلوّن لوحة الحزن عمري

شفت السكوت فبعض الأوقات مقدار
وشفت الكتابه ترفض أحيان عذري

يجهلني اللي ما عرف نهج الأشعار
و يعرفني اللي يفهم أجزاء شعري

© 2024 - موقع الشعر