للمروه رجال - نجم الاسلمي

للمروه رجالً ماتخليها
لو يشين الزمان ويسمك غباره
 
ماتغير مع ظروفه مباديها
مايدورون والايام دواره
 
اترك اللي يبيها مار يخطيها
دورة الوقت لازم تكشف اسراره
 
جعل شمر سعدها مايخليها
كل يومً تشوش راسي اخباره
 
ان عطينا فقارا القوم نغنيها
وان حربنا معادينا طفت ناره
 
وان نخانا ضعيفً رايحً فيها
سعد ابو واحدً حنا من انصاره
 
والتواريخ كاتبها وراويها
ينصف الاسلم وعبده وسنجاره
 
والعرب رد حاضرها لماضيها
كل رجل يبي يرجع على كاره
 
والنماذج كثيره عند باغيها
واضحه ماحدً يقدر على انكاره
 
لكن اتلاه لو ماهو بتاليها
نايف اللي قطع من نفسه لجاره
 
حي ترثة هل الملحا وراعيها
حي ميراد هقواته ومصداره
 
يآبن سحيم هذي من يسويها
كود نفسً بيوم الكود صباره
 
نفسك اللي على العليا مضريها
نفسك اللي بفعل الخير وماره
 
قالو اصبر ترى فيها ومافيها
قال صبرً بليا فود معياره
 
ماتشيل الرجال الا هقاويها
ولايموت الذليل الا من افكاره
 
قالو الطيبه من حض راعيها
قلت والقاهره من فعل قهاره
 
اعطو القوس ياهل العرف باريها
نايف اللي جدوده طالت اشباره
 
قصة الضيغمي مانيب ناسيها
بيرق الحرب مد لجدك شعاره
 
والبعيّر ليا كبرت بلاويها
هم قياد البلاوي وايضاً وهجاره
 
ان بدت قالةً ملزوم تنهيها
ترخص المال والا ترخص اعماره
 
لابةً يوم حاف الدار غازيها
احتمى الدار ياهل الدار حضاره
 
لو هم اثنين حامو دون اراضيها
اقعدو للكمين وصدو الغاره
 
من يخبر المصقل في يمانيها
لو معه جمع طاع الشبل وجواره
 
وان بغيت السوالف ماقدر احصيها
مار يكفيك من علم الحيا شاره
 
وانت يانايف الجزلات تعطيها
لك يمينً لفعل الطيب بذاره
 
من بذر طيبه لابد يجنيها
في رجالً خويه زاد مقداره
 
الدعوج الحضيض اللي يخاويها
شاهد له مجيدع باصدق اشعاره
 
عندهم حاجتك بالهون تقضيها
وان تجملت علمك شاعت اذكاره
© 2024 - موقع الشعر