طعن الخناجر

سافرت لك راجي لقربك ولقياك
وابطيت ماشافت عيوني عيونك

الله يسامح يالغضي منهو الهاك
اشغلك وازرت في حمولك متونك

ياليتني من اقبل اجي رحت لهناك
ولا قصرت بخطوتي شوي دونك

شفقان نظرة لابتسامة محياك
واخذ علومك وانشدك ويش شلونك

عيني على عينك وجمرة شفاياك
وبكفي امسح دمعة في جفونك

واحكي واغني واستمع في حكاياك
واداعبك واطرب لذوقك ولونك

والاعب طلوع الثمر في نحاياك
واميل لامالت عليه غصونك

واسبك ذهب شعري واعدد مزاياك
ولامن دعيت الك الفرايد يجونك

مشيت في دربك تهاديت بخطاك
واسأل مطاريش لفو يذكرونك

عزاي في مرسال منك وهداياك
صابر وراجي للمطر من مزونك

غرقان في بحرك ولاشفت مرفاك
والموج عاتي مايشابه سكونك

وانكان مت ولاتلاقيت وياك
اعرف سبايب موتتي من طعونك

طعن الخناجر طعمها سم فرقاك
امر من دمعك وحرة شجونك