يا اهل المزاين تنحّو جات صفاقه

يا أهل المزاين تنحوا جات صفّاقه
وصفاقه ان جات كلٍ حطمت سوقه
بأوصافها النادره للشعل فهّاقه
واللي تنافس حلاله تنشف عروقه
منها يذوق المرار ويكثر إرهاقه
لاشاف برقا تشجعها مع الروقه
الفوز من حظها كان الولي ساقه
والله هو اللي يدبّر شان مخلوقه
لكن كلٍ يروح يراجع اوراقه
ويهوّن ان كان ماله قدمها طوقه
قدّام منها يعاف أرياه ونياقه
ويرجع وكبده من الحسرات محروقه
ماجابها الدون والا عاقب الساقه
ماجابها الا شجاعٍ تتعب طروقه
قرمٍ ثمنها ولوهو زاد ماعاقه
ارخالها الكيس لين استاقها لنوقه
قرمٍ تميّز مع العربان بأخلاقه
وشوحاته اللي ماهي بالهون ملحوقه
عبدالله اللي تعلاّ كل شوهاقه
مثل القرانيس يدهل كل شاهوقه
من لابةٍ للمعالي دوم سبّاقه
ولاهيب في المرجله والطيب مسبوقه
ألاد سامر لفعل الطيب عشّاقه
وأفعالهم تتعب الشاعر وطاروقه
حنا عتيبه وفينا للصّعب طاقه
وليازما الخصم جينا غصب من فوقه
دون المواقف لغالي العمر سواقه
على المنايا ولا نندم على سوقه
ونشيل حملٍ عجز راعيه يطّاقه
وبالعزم نظهر على العزّام ونفوقه
وافعالنا من قديم الوقت عملاقه
روايةٍ حق معروفه وموثوقه
 
الشاعر /يوسف بن محسن العضياني