يلي تحاول تعتلي بالمراقيب
عز الركايب والمسافه طويله
من دونها شهب الليال الواهيب
كم بعدت بين الخليل وخليله
ومن قدمها عز البكار الرعابيب
اللي على بعض البشر مستحيله
لكن خلك الذيب واحذر من الذيب
وحملن يضرك جنبه لاتشيله
احيان كثر الطيب مايجلب الطيب
لا زاد حمله فوق ما لا يكيله
وكثر المجامل من دروب العذاريب
احذر لاتحسب في جنابك هزيله
عد الصحيح وقول مخطي اومصيب
اليا بدالك صاحبن تنتخيله
واليا دعالك راعي الحق لاتغيب
عط حق واخذ الحق بفضل وسيله
ًوحاول تعف النفس والمهزله عيب
وعز الكرامه بالفعول الجزيله
خلك كريم ومن كرام المعازيب
ومالك ومال اهل النفس البخيله
تبا تشوف الحسد والبغض والريب
في دربك اللي رحت عابر سبيله
وتبا تشوف من المواقف عواقيب
والوقت هذا الوقت مافيه حيله
لكن دامك في رجا عالم الغيب
الخالق اللي كلنا نرتجيله
عليك بالعراف قوم المواجيب
تغنيك عن كثر الكلام وقليله
انشد وتلقا للمراجل مناديب
ماحدن خلق عراف قوم ودليله
والطيب دلون والفعايل مجاذيب
وكم واديً ينزان من بعد سيله
والخوه اللي تحضر ايام وتغيب
براق صيفنً في سحابه تخيله
وقت الشدايد ماترد المكاتيب
وقت الرخا مثل الجبال الضليله
خلها تروح وماوراها مكاسيب
يغنيك عنها من يزبن دخيله
واليا بلاك الله بقريب وصحيب
سيفه يحده كل يومن وليله
لا صار مالك عن دروبه تجانيب
تحمله واشتال سيفه وخيله
لاتستمع للي تحش العراقيب
اللي تجي وتروح مع كل ميله
طبع الكفو مايلحقه شكن وريب
متنه مضرا للحمول الثقيله
وطبع الردي دايم قريب محاضيب
ادنات حاجه جابت اقصى حصيله
وياكثرهم من غثربوا بالمشاريب
كم من سفينه حولت في قبيله
وياقلهم من علمونا التجاريب
اهل النوايا الطيبه والجميله
هذا وانا شفي علو المراقيب
والعمر توه والمسافه طويله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين