ياصدمتي في الناس قاصي وداني - سلطان عتيق الحربي

ياصدمتي في الناس قاصي وداني
وياويل حالي دام هاذولي اقراب

ماشفت فيهم من تعنى وجاني
من يوم غاب اللي نمده بلا حساب

اثر المصالح للمصالح مجاني
من كل حدب وصوب صارولي احباب

واليوم يوم ان المقدر بلاني
الكل منهم صك في وجهي الباب

وان جيت بشكي مانطقها لساني
ماينطق الا الطيب والفال ماطاب

اعجز عن الشكوى ولاشكي وعاني
والوضع ابلغ لو تكلمت باسهاب

الوضع باحوال الزمان ابتلاني
مثلي مثل غيري لي ظروف واسباب

اشكي على الله لا قهرني زماني
الخالق اللي من ترجاه ماخاب

عالم بضيم الوقت باقصا المحاني
ماخاب منهو بالرجا جاه طلاب

عليه حلمي والرجا والاماني
اقولها صادق ولاني بكذاب

نصيت ربي يوم كلٍ نساني
عايش بعزله لاحبايب ولاصحاب

© 2024 - موقع الشعر