أمس اعرست ياسعود في قصر حلّيت

يا سعود انا البارح من الشوق غنيت
لعيون غرون عود حالي برنّه

غنيت بالقيفان بيت ورا بيت
واليا انقضى بيتن ختمته بونّه

كني كسير طاح بين النعاتيت
في غارةٍ سرد السهوم طرحنّه

يمناه مع رجليه راحن فتافيت
والخيل من ضرب قبلاه تركنّه

أوشك عليه الليل لا حي لا ميت
ما غير بعيونه على دربهنّه

وآلا كما عودٍ لحاله تحلّيت
عمره ورا السبعين قد طافهنّه

عنده عيالٍ طاولو به هل الصيت
خمسة قرومن عاش معهم بجنّه

فيهم من الصطوه شجاعة طواغيت
وفيهم كرم ما يلحقونه بمنّه

بابه مشرع ما لطم قاصد البيت
ومن جاء وله مطلوب ما خاب ظنّه

يلقون ضيف العود بأهلا وحييت
وفيهم من الرحمه لبوهم محنّه

صيته وصل لديار صنعا وتكريت
طيب العيال أرقاه لجبالهنّه

حاله مع عياله ولو قلت ما أوفيت
حالة زعيمن دولته مطمئنّه

وفي ساعتن ما ينفعه قول يا ليت
ماتو عياله والليال فجعنّه

راحو بحادث وإختلط دمهم زيت
وأجسامهم صلب الحديد دخلنّه

جاهم وهاله منظرن يلْحِق الميت
وإختل عقله والجنون ركبنّه

يجمع عمايمهم من الأرض والسيت
ويضمهن للصدر ويشمهنّه

يذكر فعول اهل المواجيب والصيت
ويذكر معاورهم وضعفه وسنّه

ويجهش بصوتٍ فتت الكبد تفتيت
صوتٍٍ من أقصى الجاش حزنه يدنّه

ما له ورا الونات غير التناهيت
يطفي لهيب الجوف بإلحاقهنّه

حالي كما حاله ليا أقبلت وأقفيت
مما سمعته كيف صدري يكنّه

مماسمعته فار دمي وفزيت
فزة قريص انياب دابٍ كلنّه

دابٍ عطاه السم من بعد تثبيت
لين الظلوع العوج وصل بهنّه

اوحيت لي علمٍ وياليت ما اوحيت
لا عادت الأيام وجروحهنّه

ما اظنها تبرا بمرّه و حلتيت
ولا اظن حتى الطب ينفعبهنّه

يا وقت في جرح الضماير تماديت
لوعتهن يا وقت وادميتهنّه

لقيت في الأيام ميله وصديت
لا جيت ابا افتح باب عز قفلنّه

هزيت بيبان السعاده وطقيت
لين فترت يمناي من طقهنّه

وناديت يالأقدار ناديت ناديت
اما اسعدن للحي والا اقتلنّه

اما حياه اقول فيها تهنّيت
ولا تروح الروح واقول سنّه

في ما مضى يا سعود في الصدر كنيت
حبٍ بقلبي والظلوع كتمنّه

ليش اقتل الإحساس ما دام حبيت
وليش اجحد الأحداث ما اعدهنّه

يا ما على رجم المحبين عديت
وبينت فيه اسرار واخفيتهنّه

اخفيتهن عن كل مخلوق ما ابديت
وسندتهن للنود واظهرتهنّه

من دون لايدري بشر ويش قاسيت
مواجعن يا اخوك ما احصيتهنّه

هذا بلاي الي عن الناس خفّيت
صابر عليه سنين قلبي يعنّه

والا ورى حالي كما عود كبريت
واخلاقي الشرسه وشيبٍ جبنّه

واليوم راح الي عشقت وتمنيت
الي ظلوعي بالغرام احتونّه

أمس اعرست ياسعود في قصر حلّيت
والحلم ظاع وخاب ظنن نظنّه

مماحصل يوم امس لوعه تكوّيت
بأصياخ نارن في الفواد وسمنّه

ونيت منهن غصب لا طوع واغشيت
وشلون بصبر والخفوف انجظنّه

حاولت اكابر وانتهظت وتعزويت
لكن حزن اعضاي قد شلهنّه

عزيتهن في الحال وشفاي عضيت
وفي موقف التشجيع حطمتهنّه

ومن جرب الي صار ماقال زليت
يدرك مدى الصدمات وآثارهنّه

يعذر ليا مني من الوجد غنيت
ويقول ماقصرت في وصفهنّه

وفي الأبله الزراي ماقط لديت
ولا طوّل الأشناب تفتيلهنّه

نوف اعرست يا سعود وش عاد خلّيت
مير اتصل في زوجها انته و هنّه

ويا سعود كان اني بعدها توفيت
هذا القدر يا سعود والموت سنّه