دمعة المشراق - عـــــذاري السعودية

بحق الله لاتقرب ولاترسل ولاتشتاق
أنا مالي على قربك من أوجاع الزمن حيله

بحق النظره الأولى وحق الدمع والميثاق
وصالي من أحاسيسك على شاني أنا شيله

تعبت من السنين اللي عطتني من يديك طراق
سوايا هالضروف اللي لقلبي سمّه وويله

أنا مااخترتها فرقا وإنت اللي تبيها فراق
حلال إنك ترددها حرام أقولها الليله !

غفا من مبطي إخلاصك وش اللي في ضميرك فاق
علامك يايدينه من عرفتك وإنتي بخيله

تذكرت الحياه اللي يعيشوها وأنا مِنْعَاق
ولحظات السرور اللي طَفَتْ مامنّها فتيله

تذكرت التجشّم والتعشّم والعنا والساق
الى راحت وعود لي قهرها يسحب بذيله

وحزنك ياالهدايا من خريفٍ طيّح الأوراق
وصارت للشعور دموع وأوراقي مناديله

تذكرت الكآبه والغرابه والتعب وإرهاق
جروحٍ عَانها في داخلي من فِعْله مهيله

عطبها ماعطب نفسي كفى يادمعة المشراق
ولكنه كمن ضيع أبو محتاجته عيله!

مغاليق إحكمت لاتنتظر من يفتح المغلاق
عليك الله تجيب الشوق قدامي وتحكي له

وعلمه اش عطاك الورد وش سوت لك الأعماق
وعلمه بخفوق أعطى بمايعجز عنه جيله

وعلمه إن مامثلي ولاقبلي أحد لك لاق
مدام إنسان سوى لك لزوم إنك تسوي له

يناديني وأنا مقفي و لا حتى معه ترياق
أنا ماباقي بصوتي حروفه لجل أناديله

وهبك العمر أمنيته وسببت لرجاه إخفاق
رعاك الغدر في ظله وكنت أصدق مواويله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر