خآتمٌ الماسً ,

لـ مقبل البلوي، ، في غير مُحدد، آخر تحديث

خآتمٌ الماسً , - مقبل البلوي

يا نجم ياللي في غياهيب الادماس
بين النجوم الساهرات العوالي

سقت النظر صوبك بعد هجعة الناس
والعين مع سوقة نظرها طرالي

الهاجس الغايب والانسان حساس
يروح تفكيره جنوب وشمالي

انا الذي لا دق بالقلب هوجاس
اطلقت للافكار واسع خيالي

ماجال فيه البال يا هومة الراس
سريت مع مسراه وارتاح بالي

لو المصاعب دون الاهداف حراس
تطول هقواتي صعيب المنالي

الصدق برهاني والامثال نبراس
اقول والواقع يبرهن مقالي

ولا الكلام اللي يجي دون مقياس
يفتح علينا للملامه مجالي

يوم الحياض بحامي القيض يباس
هداج ميرادي ليا طاب فالي

ماني رجاوي كل ما هب نسناس
اسعى ورى اللي ما له اول وتالي

ذبح الرجا لا صار في خنجر الياس
يرخص نزيف الدم لو كان غالي

لو طعنة المطعون من رمح جساس
ما تحول دون الثار سود الليالي

اجيال يطلع بعدها جيل ذو باس
مثل السيوف المرهفات الصقالي

تسلطنت روس النوادر على ساس
ما هي سوالف مش حالك وحالي

يا ناقش الذكرى على خاتم الماس
ذكرتني بالخاتم اللي غدا لي

ما غيبت عيني عنه ساعة نعاس
ولا ضاع واسباب الضياع اتكالي

اللي غدا به داخل الموج غطاس
يوم البحر يصفق على كل جالي

واليوم لو صبح الفرح دق الاجراس
عن مكسبي رضيت في راس مالي

صار الزمرد والذهب كنه نحاس
ما شاقني يا مدورين الكمالي

جاب الخبر ولا غدا فيه عساس
ما تبكي عيوني نهار ارتحالي

© 2024 - موقع الشعر