سبابة الاحزان - علي العضلي

الخافق اللي يحتري منك ريه
قطعت ماه .. واكسجينه وضيه

لاترحم ولاتترك الرحمه تنزل
اخطيت في حقي ياكبر الخطيه

جحدت قلبن ..كان اكبر سؤاله
يسكنك بالغيم ولا الثريه ؟

جحدت قلبن كان اكبر همومه
يداعب افراحك .. صباح وعشيه !

الخافق اللي حس انه يخونك
يوم ابتسم وانتي ماكنتي هنيه!

جاك الفرح والحب مني هدايا
واحزان ليلي والبكى لي هديه !

يوم ابتسم لك وجه دنياك رحتي
ونسيتي انه كان بالقيض فيه

في غيبتك كن الثواني توالد
وكن الوجع مدت اجاويد ليه

كم لي ياسيد الغيد وانا غريقك
وانا من اللي يغرق بشبر ميه

جرحتني جرح(ن) .. تمكن من القلب
وارداه مقتول الهوى يارديه !

شلون قلبك طاوعك تجرحيني ؟
وانا لبردك اشتعل نار حيه !

لا ياخليلي وانت مالك خفوقي
انت الوطن وانت البلد والرعيه

لا ياخليلي والمواجع فقلبي
مشيوفت(ن) ماعاد فيها خفيه!

سبابة الاحزان تشر على أخطاك
هنا بشر ياناس اتته المنيه!

هنا الثري قلبي يضمه وعيني !
خدود الورود اليوم منها نديه

مدري خطا الاقدار ولا خطاك انت
بس الاكيد اني ياسيدي الضحيه

لو الفراق انسان كان اغتياله
مابين ذي يدي ومابين ذيه !

كان الحزن ورده ف انا بي بساتين
وانتي بكلتا يديك قمتي بريه

© 2024 - موقع الشعر