تصومين ؟!

ياللي يمين الخد لايسره هايم !!
... غمازتك .. ياكم بها من طريحين !!

وياللي الدلع في عينك الحور عايم
... للناس رب وللمحبه قوانين !

ترمين .. نظراتك .. على كل صايم !!
... ذليتي قوم(ن) قبل عينك عزيزين

ينبوع غنج وفوقك السرب حايم !
... وكلن يبي يارد ويروا من العين !!

وانا اللي من حسنك اذوق الهزايم !!
... ماعاد به رجوا ولا به تحنين !!

شوفي حياتي كل الاوقات نايم !
... يمكن اعيشك حلم .. واملى بك العين !

دايم تعذر وانا أعذرك دايم !!
... ودايم على كثر المعاذير تخطين

ماني ف حبك ياكحل العين سايم !!
...انا عطيت ايام وشهور وسنين !!

لاتلومني وانا لك اليوم لايم!!
... عندي سؤالن لك .. يخل الموازيين !!

ياريح ريحانه يا هبة نسايم !!
... من قبل لا مغربك يحمر ويبين !!

ابسالك .. لبى الخدود الندايم !!
... لاشفتي نفسك في المرايه (تصومين) ؟!