الصدر سجن

الصدر سجنٍ والغلا فيه محبوس
محبوس بين ضلوع صدري وزواياه

والقلب به هايم وبالحب مغموس
متشربٍ عشقه وتقطر خلاياه

وكنه بعد فرقاه يسحب على موس
وجمر الغضا يحرق عروقه ويصلاه

أقول ذي أزمة تعدّي وكابوس
وكابوس ليلي نور هالشمس يجلاه

وأصحي وشمسي بالضحى جملة شموس
وكابوس صدري يعصر القلب يفراه

لا جيت ببْدي ولمحاذيره أدوس
لواني عرفٍ قيّد الساق بخطاه

وذكرت روسٍ ما علت فوقها روس
ما تنزّل الهامة ولا تحني جباه

حفظت من لغات هالعالم دروس
لكنّ حرف الحب أنا عجزت أبقراه

حبه بقلبي مكونٍ جذر مغروس
مغروس في قلبي من أوله لأقصاه

وفروع حبه خلت العقل مطموس
بفروع حبه ظلل العقل غطاه

أقابله واعيش عالمْه هاجوس
وأصحي ودقّاتي ترجّى وتنخاه

أشعلت ذكره بأظلم الليل فانوس
عتمات ليلي منوّراتٍ بذكراه

لو الوله يثمر لو الحب ملموس
غطيت بأشواقي فضاءات دنياه

ضاق الصدر وأصبح مثل راس دبوس
ما يتسع ذرة بعد طول فرقاه!