ازعلت خلي

اركد ياخلي وليش ذيك الطفاقه
ليتك زعلت عندحاجه تسوى ياخلي

احذر ترى فرقاي مر(ن) مذاقه
اثقل شوي بس خل عنك التغلي

لو نستمر بتكون احلى علاقه
ولو ننفصل بأشوف دمعك يهلي

مثلي قليل ومثلي يصعب فراقه
والبدر يقول تكفين حلي محلي

لو شافني ابكم بيحكي بطلاقه
وينشد قصيد الحب فيني ويعلي

ولو شافني مشلول وبرجله اعاقه
يمشي سليم ويقبل فيني يهلي

وفوق الجمال فيني ذوق واناقه
سبحانه اللي له عبيده تصلي

كني بجمالي وردتن وسط باقه
والحب عندي ماهو لعب وتسلي

اوفى من الوافين واصدق صداقه
واللي اخذ قلبي انا اجيه كلي

ماني من اللي لاحمى الوقت باقه
ولاني من اللي لا طول الوقت ملي

اصبر على خلي وتجيه استفاقه
وتقوم به عروق قلبي وتهلي

الصبح طالع وعندي باين زراقه
عيت عيوني تنام ازعلت خلي

مدري هي طيبة قلب ولا حماقه
يومي اراضي انسان مايطيق ظلي ؟!