أول لقانا كان بوسة شفايف
واخر لقانا كان صفعة على الخد
ان كان مرتاع و من الهجر خايف
يبشر بهجرانٍ مع عنادٍ وصد
والله لو ياكل يدينه حسايف
ما اعود له ولا له الين وأرد!
......................................
لا تنتظر ودٍ بجرح الكرامة
ما احدٍ جنى الرمان من نبت حنظل
والله لاأبيعك بيعة اهل اللآمة
ما عاش من خلاني بيوم انا أنذل
.............................
مساء القصايد وعذب الكلام
مساء عطر الورود الليلكية
مساء عودٍ معه مسك الختام
عليه ماركاتٍ قرشيّة
مساء أنوثة تروي بسلام
قصايد حبها وبشاعرية
تعاني هموم وجروح الغرام
غرام وعشق عينٍ نرجسية
....................................
لك وحشة ٍ بخافقي ما لها قياس
وحشة وشوق أم لفلذة كبدها
جمعة مباركة ياأعز هالناس
يا عيون أسيرة يا غلاها وسعدها
....................................
أجمل شعور انه يظللك رجال
غصبٍ على قلبك تجين وتبينه
تلقين قلبك لا شعوريّ له مال
مهما تحاولين ما تبعدينه
حتى جمالك لا قرب منك يختال
يختال وانتي بخطوتك تجذبينه
تربكْك سيرته وفي كل الاحوال
ودك بكل احواله تراقبينه
لكنّ بهمس لك ومهما الزمن طال
لا تفكرين بلحظةٍ تملكينه !
...................................
لا زارني طيفك وانا بتالي الليل
لا من سرى بي خاطفٍ لي عجل
يفوح لي عطرك مثل ريحة الهيل
والجسم يتخدر وكله كسل
والعين ثملا ترتجي شوفة سهيل
مكسورةٍ عيني وكحلها خجل
والاذن وادي متيم بزخة السيل
صوتك وينبت به خزاما ونفل
تستاهل التدليل يا احلى الرجاجيل
تستاهل التدليل وأحلى غزل
أشتاق لك موتٍ وأحبك أنا حيل
ما فيه مثلك بهالدنيا رجل!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر