صباح الخير.. لا والله صباح الذل والحرمان
صباح الهم والخيبة صباح الضيق والحسرة
صباحٍ نكهته موتٍ ووجهه شاحب وغضبان
صباح اللي على أرضه يهان وينحدر قدره
يصيح بداخل اعماقه صياح العاشق الهيمان
ليامن هام معشوقه بغيره وانكر العشرة :
وطن علمني لو مخطي ! وطن قلي اذا زعلان !
هذاك اللي تعزوابك ترا منته على خبره
وطن كيف بشوارعهم ترش الما وانا ضميان
وطن وشلون تطعمهم وانا عايش على القشرة
وطن يرضيك تاويهم وانا وسط العرا بردان
وطن ليه اشعر بقيدي وانا لي هامةٍ حرة !
وطن من وين ألقاني اذا ما كنت لي عنوان
وطن ارجوك جاوبني ابي تحكي ولو مرة !!
تراني من بعد عزك جريح ومتعب وغلبان
فلا صوتي غدا صوتي ولا النبرة هي النبرة
تعبت آجامل الحاجة واعامل ضيقتي باحسان
واقول اصبر ومن يدري وش اللي جاينا بكره
ولكن فيك يا بلادي نسيت ان الامل خوان
وإني بزرع أحلامي وغيري يحصد الثمرة
بعد ما كان ف دياره لخير المملكة شفقان
وينظر حال أبسطنا ويتمنى يجي ظفره
نبت له ريش واستأسد وصار بدنيته سلطان
تغير وضعنا فجأة وأصبحنا تحت امره
وهو لا من جماعتنا ولا حتى من الضيفان
ولا الشر الذي نبغى ولا الخير الذي نكره
وياليته قبل يلفي تكرّم واطرق البيبان
لجل من بيننا يلقى عشيرٍ فاتحٍ صدره
على وشهو نبي نرضى ؟ و احد يتحمل الخذلان ؟
يا غفلتنا.. ترا طالت "يبي للمسألة دبرة" !
ثرانا مابه مساوم ولا قسمة على اثنان
وراع الاصل ما يقبل يساوونه مع زمرة
صحيح الطيب عادتنا وحنّا للوفا أعوان
ولكن حزّ بالخاطر جميع اللي سبق ذكره
بسيطة يا زمن لامن تنكر لي حقير الشان
ترا من باع اوطانه خطيّة لو عليه اشره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين