شيخة القصيد - فواز فارس الدواي

بديت بسم الله وهو خير رحمان
ماغير رب الكون راحم ورحمان

جلا جلاله خالق الفلك وشلون
سبحان ربٍ خالق الفلك سبحان

خالق جميع الكون ويا الخلايق
هو الذي خالق جميعات الاكوان

اللي خلق ادم وحوى من طين
عقبٍ درج من بعدهم نسل الانسان

مكرم ابن ادم بعقل وبفهامه
مكرم ابن ادم على كل حيوان

نعمت عقل والعقل نعمه فضيله
ايجنبك عن كل خمله ونقصان

وعقبن تناسل امن ادم قبايل
فيهم عرب والروم والفرس بإيران

والفرس ويا الروم يتعب نسبهم
بالجيك ويا لصين وديار الألمان

ولا العرب ابخص بقصت نسبهم
اعرف نسبهم من قديمات الازمان

تفرعو فرعين ياللي تبيهم
افروع من عدنان وافروع قحطان

اعرف انا الاجواد والجود يعرف
عند النشاما ثابتن فيه عنوان

ابلشتنا ماغير جدك وجدك
كن العرب من دون ساسن وجدان

جدي فعل فعلن يروع يهول
صلخ ذبح رح انشد فلان وفلان

والمشكله جدك عسى الله يبيحه
قصيت جدك ناشدن عنه شيبان

مايعرف الخيل ويغره رسنها
ماهو بفارس ينقل السيف شامان

وانا ليا من جيت ساكت وصامت
ماني خفيف يسولف بكل ديوان

ماودي والله اذكر اللي بقوله
لكن دبلت الجبد والبال عمسان

ماني بمداحن لجدي وجده
الطيب يخبر بين ذربين الايمان

جدي حكيم الراي راعي الشكاله
محكمن عقله بثقلن وميزان

قرمن اربوعه كلها ماتمله
خالد ولد براك دواي . رقبان

وجدي من امي هو عضيده طريده
سعد مع خالد الاثنين عضدان

ولا الشجاعه لا تجي للشجاعه
هو شايل البيرق مع حرب الاخوان

وجداني الباقي حرار الصحاري
فريس فوق الخيل اعيال تومان

عزوتهم العوجا ليا من تناخو
هم سعد عين اللي به الضيق عوجان

وكانك تبي الفريس واجد تراهم
براك مع ضاحي ومحسن وكمعان

وبريج وغضيان فارس وسعدون
وفلاح ويا فهيد مع ساق عدلان

وقبيلتي مثل البحر لاسبحته
غويط جمه من سبح فيه غرقان

لاكن انا اسبح في بحرنا واعرفه
واعرف بحورن ثانيه بكل الاوطان

اببتدي في لابتي لابة الطيب
لابة سلايل عبس من روس عدنان

بني رشيد اهل الصخا والشجاعه
من عام الاول يوم غيبات الاذهان

اليا دخلهم الدخيل فزعوله
يرقد ويامن دونه قروم شجعان

ولا الكرم فيهم كرم ومتميز
الطيب من ربعن محاشيم حيران

الطيب عرق وفي فؤاد الرشيدي
مثل النظر الله حطه بالاعيان

وان كان قولك شيخكم ابن براك
ولا المسيلم ماعرفنا بوكدان

الحين بعلمك ياللي تنشد
تبي تميز عقلي ان كنت فهمان

اربوعي واجد في ديارن عديده
بالمملكه وكويت وديار سودان

وارتيريا ويا مصر والجزائر
تفرقو يوم المغازي والاضعان

وقبيلتن من دون شيخن سنافي
مثل البنايه هابطه دون عمدان

وقبيلتي فيها شيوخن كثيره
كل فخذ له شيخ وعقيدن وفرسان

حماية العطفه قروم المسيلم
اخوان هدبا .... طيبين وشيخان

عاصي مع مطلق وهاجد وماصول
ومنيع ذيبن يكره كل شيطان

وبراك والبراك عزن مشيد
اشيوخ نجد تكفها دون منان

اهل البويضا محتمين التوالي
شيخان شجعانن وخطلين الايمان

ادليم شيخ وجاسم الخيل شيخن
الخيل لا وحت صيحته صابها جنان

وابن فديغم اضفر امن الظفاره
والصيرمي مشعان مشعان مشعان

وابن سمره الذيابي على العز
شيخن يغط الروس من فوق الامتان

افعولهم تعرف بوسط الحجازي
واحدهم مسمى على الذيب سرحان

وابن سعيده ويا ادليم ابن صبح
وهذا ابن جدوع والعود نملان

ومبارك البلوه طلع بالدقابيس
وشبيب اخو ونيه عقيدن وبطران

وسعود بالنمره عقد بالجموعي
عقيد نمره لاغدى الجو دخان

وابن بويدي وبدوي والشميلان
وسعد ابن ربعي مع ابن شيتان

وكعمي ومطيول مع ابن نونان
وخشاب مع ملهاب وياه رمثان

والهلفي باتل بن شعف ينطح الجو
يوم الحكم يشتب قازن ونيران

ولا ذوي قرينيس عز الاصايل
ماباقي منهم بالنسل كود نسوان

والحين ابجرد كل فخذ وبعده
اللي درج من عبس وبوه عيلان

ابذكر فخوذ القبيله الكبيره
ولا الصغيره يصعب يعبر لسان

اهل الشجاعه مجفلين الذيابه
فريدسي ذيابي هلا بالجلادان

ومهامزه وصياد ورجال عوني
رمايه ماتخطي بنادقها نيشان

وعوامره جريشات ويا الدواميك
هم طب منهو بالقى كان مرضان

وعراعره مكاحله عايضاتي
عسافة اللي ماتبي تلة اعنان

وبراقعه شوالع والرويضات
ياويل منهو التقاهم بميدان

مضابره مشاعله والخيارات
اذياب مسكنها على روس ضلعان

عجاونه وزبون ويا الوهادين
كم شيخ قومن لاغزى رد زعلان

ونوامسه الموت ويا الوهادين
كسابتن للذود خلفه وحيران

وبراعصه زنيمات ويا البراطيخ
شدو لدار افريقيا فوق سلفان

ودعايجه حميدات ويا المراوين
وال المسلم وال سلمي وزيدان

شدت ركايبهم لمصر القديمه
دون الهرم حول الهرم داخل اصوان

ومنهم اللي نازلن بالجزائر
ومنهم اللي ساكنن حول عمان

وانا تراني ...عجرمي من هل الخيل
يوم المغازي نبجنا كان قهبان

ارماح بصدور النذاله الطواغيت
من لابتن اليا اعتزت بسم دعجان

وباقي الاجواد ما جا بها قصور
الكل منهم فاعلن فعل مليان

وباقي العرب فريس من قبل الاسلام
مركابهم للخيل صغار ورعان

ابن ربيعه وبعد امرؤ القيس
وعنتر اللي غازين قوم نعمان

وذياب ابن غانم وابو زيد يازيد
والزير سالم ونمر ابن عدوان

واسد الجزيره اخو مريم مبارك
خاض المعارك بيرقه بكل خدان

وعبد العزيز اللي حكم بالجزيره
فارس يهابه اشجع الانس والجان

اليا اعتزى مايعتزى الا بنوره
مطوع اللي ماشين بدرب عصيان

وشالح وابن هدلان ويا الفديعي
فريس من قحطان من صلب هدلان

والقرمله شيخن ولاهو بسيطي
شيخن على ساس العرب ساس قحطان

وعوازم الموت المصفى بلاوي
زعيمهم جامع ترى ابن هدلان

عطا عطا لاصار وقت الملاقى
ارجال في وقت الملاقى وشهمان

ومطير نعرف شيخها اخو جوزه
اخوان جوزه هم هل الصيت دوشان

وابن الفغم شيخن يسوي هوايل
ضيدان خيال المعاشير ضيدان

وابن شرار الذيب ويا ابن عشوان
وصاهود ابن لامي على قوم جبلان

ومن عنزه الهذال شيخ المشايخ
شيوخ وايل من علي لي سليمان

وحجاب وعقاب العواجي نموره
تاريخهم بالطيب والمرجله بان

وحرب معروفه ولاهي تخفانا
ابن نحيت ومحسن الفرم سيسان

وشمر لها شيوخن كثيره غزيره
ال الرشيد شيوخ والموت جربان

وعتيبه فيها رجال وابطال وشيوخ
ابن حميد ومانسينا الربيعان

وعجمان والعجمان فيها صناديد
معروف ابن حثلين والشيخ راكان

وظفير تعرف ماهي والله خفيه
اشيوخهم عند المصاعيب سوطان

وخوالد اللي طيبها ينشهد له
ابن عريعر شيخ فيها وسلطان

وهذيل والمره معاها الدواسر
شجعان وطوال الشوارب وعصمان

وبلي مع جهينه معاها الهواجر
فيهم نشاما طيبينن وشيخان

وبقوم وفضول وتميم العريبه
كم فارسن خلوه يمشي بالاحزان

وعتوب وسهول ومعاهم عداوين
كم فارسن من رمحهم صار سكران

وبني صخر والدليم ويالشرارات
والمنتفق وسبيع ورجال هرشان

فيهم مناعيرن على الخيل تعرف
مير تخفاني والله ورب الامزان

وباقي القبايل فيها فريس واجد
اشيوخ ورجال على الجيش عقدان

ولاني بظالم من تنومس فعوله
لا والذي نزل على الناس قرآن

وابي السموحه كاني ناسي قبيله
ماني بحاصي كل فارس على حصان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر