طيور الأبابيل

والبِن وعلوم الرجاجيل والهيل
والورد وعهود الغرام المطاعه

والشعر واشلاء المقفين والليل
والصدق وطعون الصديق وضياعه

لأجندل جروحك سيوفن مساليل
واطعن بها ذكراك في كل ساعه

قبل امس بليت بعزاك المناديل
وش تنبش الجثمان ؟؟ خله بقاعه

زجيت بك للموت ماهو بتأويل
ميّت معاي وحي بين الجماعه

عشرتك صارت كنّها كذبة ابريل
وقدرك ترجّل من علوو ارتفاعه

ياصاحبي ياللي كسرت القناديل
يخنقك نوري يوم زاد اتساعه ؟

بالله قلّي وش بقى بالمقابيل
لو كان بك شمسن وصلنا شعاعه

لو كان من طعني جنيت المحاصيل
فأنا حلالك لاترد البضاعه

مار البلا (قال/ك) اذا عوّودت قيل
وايقنت تاليها بعقم الاشاعه

يامركبٍ مايفرق العدل والميل
من وين ماهبّت تقفّى شراعه

قدمتني في سفرتك للمهابيل
حتى ملا لَحْمي بطون المجاعه

تناهشت ظَهري طيور الابابيل
حيله ... ولا جتني بثوب الشجاعه

هذا وانا ماني بغازي على فيل
ولا لهم من عند ربي شفاعه

عزي لقلبن يحذفونه بسجّيل
ذنبه بياضه واصلن للنصاعه

صاحت شرايينه من الحط والشيل
والطيب يشكي من جنون اندفاعه