ياعين ابوي - سالم السويلمي

ياعين ابوي انكان ماني على البال
انتي ببالي عاملت/لك عمايل

ياجلجلة ضحكه تقطّعني اوصال
من شانها صلّيت بطعوس حايل

ذاك المكان بغيبتك اصبح اطلال
ياما رثيته بالدموع الهمايل

ياما تلحفتك وهو فوقنا ظلال
وياما نقشنا فوق صدره دلايل

شيخ ٍ شموخه من بعد غيبتك زال
وماعاد يُذكر من عيال الحمايل

غبتي وانا فيه انثر الشوق باهمال
ولشوفتك ماتت جميع الوسايل

اسأله جاوبني بخيبات الامال
جاء في ضفاف الياس حط الرحايل

همت بصحاري غيبتك اقطع اميال
ضامي ولا يروي ضماي البدايل

في نظرتي من كسرة انفوس الاطفال
وفي زفرتي من ولولات الثكايل

ملتي عن عيوني ومعك البخت مال
ولا جنابك شوقي الا الفشايل

طالت وانا معها على كل الاحوال
اسأل والاقي اجوبتهم هزايل

عفت المكان وخذتلي عنه منزال
من غيبتك لاشك مابه صمايل

فجاه وعن غفله ومن وسط الازوال
لمحت زولك في مكاني تمايل

الروح حسّت في وجودك على الحال
والشك قام وبرّكته الرسايل

انتي هي انتي بعد غربه وترحال
قربك تأكد واصبح الشك زايل

في جيّتك صدري لك ايجندل ابطال
لجلك صحوبي من جميع الفصايل

من نشوته شاعرك يضرب بك امثال
ومن سطوته فارسك سوى الهوايل

تدري غلاك بجيّتك فيك وش قال ؟؟
والا بلاش اقول . ماني بقايل

بس الوكاد ان كنت ماني على البال
انتي ببالي عاملت/ لك عمايل

© 2023 - موقع الشعر