اهطيل وانطيل - مضواح بن شتوي

قالوا نبي منك قصيدة جديده
شاعر ولد شاعر ومن بيت شعار

عطنا البيوت الفاتنات الفريده
اختار ولاّ ودّنا منك نختار

قلت القصيد اليوم كل له اييده
نصف الشعب صاروا من الشعر تجار

كلن تفنن في تنّوع رصيده
بين الريال وبين درهم ودينار

كم واحد يبغى يسوي وليده
اهم شيٍ يلفت قلوب وانظار

واكبر طموحه صورته في الجريده
ولا ظهوره في قنوات الا شعار

وليا حصل زرقه وفرصه سعيده
يمكن يشارك في اكاديمي استار

رخص الشعر ما بين عبده وسيده
ماعاد له حشمه وقيمه ومقدار

اتناهشوا لحمه وجزوا وريده
ماكنّه الا هبرةٍ عند جزار

حتى شواعير الغنا والنشيده
قالوا لهم شعار جزلين وكبار

وصاروا شريحه في البلد مستفيده
اخذوا حكاية قصة الهر والفار

هاذي الحقيقه والعلوم الاكيده
من زعل منها يلتفت لا اقرب اجدار

خلاص. ولاّ . كل ما اقلت اعيده؟
بعض المجامل يدخل العبد في النار

المعذره ما عاد عندي قصيده
من يوم صار اهطيل وانطيل شعار

مضواح بن شتوي
© 2024 - موقع الشعر