قال نرجع

الهنوف إللي حلاها ساق عقلي للجنون
قبل لا تسلب خفوقي قلت : هو ذيّا جُبا

خالفتني في الطريق تسوق خطوتها بهون
كن الأرض تقول تحت رجولها : حبا حبا

كنها تمشي على النوتة وخطوتها لحون
لحن خطوتها (( نهاوندي )) وأنا أتنهّد (( صبا))

سحّبت فيني وخلّت نصف تكويني عيون
ونصفي الثاني يجسّد أجود أنواع الغبا

فاهيٍ ماغير أناظرها وأطاردها بدون
مانطق بكلمة وكن الصمت بلساني ربا

قلت : نرجع ياخفوقي ؟ بس يكفينا طعون
ألتفت لي : قال نرجع قال ! .. ياشيخ تهبا

غير سقها وأنت ساكت لاتضيّع هالفتون
خلنا نشوف آخرتها كود ياتينا نبا

قال : خايف ؟ قلت : لاخايف ولاهم يحزنون
بس حظي دوم بارك وإن هداه الله حبا

قال : أجل مافيك شدّة ؟ قلت : ومافيني سكون
قال : أنا هذا مكاني وإنت سوّ إللي تبا