الذيب الجزء الثاني - فهد عوض العازمي

ياضلع أنا بنشدك مامرك الذيب
مامرك ويحسب نجوم القوايل

مامرك وكنه معذب بتعذيب
ودمعه على خده كما السيل سايل

وراسه من الدنيا مبين به الشيب
وهمه بوسط الصدر صايل وجايل

من دنيتن ماتصفي لراعي الطيب
ماتصفي ألا للردي والمحايل

دنيا بها النكران والشك والريب
والنمنمة والمهزله والتحايل

والغش والتزوير والكذب والعيب
والذم والجحدان لأبو الفضايل

صارت طبيعي مابها شي ن مريب
بالمختصر ياذيب كلها هوايل

أسأل مجرب جرب العلم ياذيب
يعطيك علم مدللن بالدلايل

دنياك هذي تحترم مملي الجيب
راع العلوم الناقصات الهزايل

وأهل الوجيه الباردات المشاحيب
وأم الدلع والكيد وأم الجدايل

وتنكر هل المعروف وأهل المواجيب
اللي لهم صيتن بكل القبايل

اللي على المخطي سيوفن محاديب
واللي بفعل الطيب دايم أوايل

لن الزمن ضايع وضايع به الطيب
و لا يفرق بين ثابت ومايل

ياذيب روّح فوق روس المراقيب
وأعوي ثلاثن فوق روس الطوايل

وخلها على اللي يعلم السر والغيب
ربن عزيز الشان واف الخصايل

وأقنع بحاجه مابها شك ن وريب
كل ماعليها فان والشك زايل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر