الــرجــال الــمــغــاويــر - فهد عوض العازمي

سلام مني عد ماغرد الطير
وأعداد ماهلت علينا من أمطار

وأعداد ماشفنا من الناس تزوير
وأعداد ماتسقط من أوراق الأشجار

يم الرجال أهل الكرم والتقادير
اللي على الماقف صناديدن أخيار

أبمدح اللي يحتمون المظاهير
اللابه اللي كلها أسباع وأنمار

ربع العوازم كالرجال المغاوير
أهل المروة والمعزه والأحرار

هم الرجال أهل السيوف الشواطير
اللي على الماقف طويلين الأشبار

كم شيخ قومن نذبحه بالتبارير
وكم ناس ذاقوا مننا أصعب أمرار

حنا ترانا نجزي الخير في خير
وأيضا ترانا مانسيناك ياجار

وحنا ترانا نعرف الحق ونغير
وأيضا ترانا مانجامل ونحتار

وحنا حمينا نفسنا فالحواشير
وحنا ترانا بدمنا نغسل العار

وحنا حملنا للقبايل تباشير
وحنا على القيعان كالسيف بتار

وألا القبايل مابها أي تقصير
ووسامهم طيب وفخر كثر أخطار

وأنا ولد عازم عزومي ترى غير
وسيفي ترى بالحرب ملفى للأشرار

وختامها صلوا على مبشر الخير
محمد المختار يشفع للأبرار

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر