الــــــــذيـــــــب

بيتن عجبني من قصايد كثيفة
مدري لمنهو بس ماهوب مسروق

((وين أنت ياذيب الليال المخيفة
فوق الثرى وألا عليك الثرى فوق))

الذيب ماياخذ نصيبة نصيفة
ومايحني الهامة على أي مخلوق

والذيب ماياكل من عظام جيفة
حاشم جنابة من ردا كل مطفوق

يابو محمد والليالي كسيفة
بشكيك قلبن من غثا البعض محروق

ترى قلوب البعض ماهي نظيفة
وترى قلوب البعض تخلا من الذوق

من سبة اللي خان رفقا عفيفة
راح وتنكر تارك القلب مفتوق

خان الصداقة والصداقة شريفة
وخان الوفا والطيب والطيب ماثوق

هو ماخذ الرفقة على كيف كيفة
مايدري أنه لي على راسة حقوق

خلا رفيقه في ظروفن عنيفة
باع الرفاقة بيع في داخل السوق

الله ياظروف الزمان المخيفة
كيف الرفيق يخون ويصد ويبوق

الطيب مايبغى رجالن ضعيفة
يبغى رجل طيبة على طول مرموق

بالطيب سباقن ومشهور سيفة
ولا الردي دايم على الطيب مسبوق

وراع الشهامة والكرم مانضيفة
لهل الردى والخبث والكذب والبوق

والحين وينك والليالي مخيفة
فوق الثرى وألا عليك الثرى فوق