وا حسيفي يازرعنا اللـي زرعنـاه - زيد بن فيحان الكريزي

وا حسيفي يازرعنا اللي زرعناه
حت الثمر ماباقن ألا ركيبه

مدري متى أزرع وانتظر وأترجاه
رجوا الغريب اللي حياته صعيبه

يبى المراح وياعمر تقصر إخطاه
ماله جدى ألا كل صوت ٍ يجيبه

العسر حده والليالي تحداه
والعسر حراب ٍ يحده حريبه

والله لولا الدخان لولاه لولاه
ماغيره أكنه ياعمر والتهي به

لاأجر صوت ٍ كل من حولي أوحاه
يفضي ويسطي في العظام الصليبه

على سبل زرع ٍ تهادر ركاياه
الجم وافر والشريب لشريبه

يشرب إزلالي من ركايا ً مطواه
قدام منحاب السيول يغدي به

بعض الشراب من الأهانه تركناه
لو يهتني به غير مانهتني به

رجل ٍ بليا عز ماله إمعاناه
لاتحسب إحسابه ولاتقتديبه

سواة من ضيع يمينه بيسراه
من يفرز الماء ياعمر من حليبه

صبرت مير اليوم مابه إمراواه
كل ٍ يعد اللي حصل في نصيبه

الله يعين اللي صبور ٍ إبلواه
الرجل وحده ماحد ٍ شاف عيبه

الله من قلب ٍ إسلوكه ملواه
ما أدري غلط ولا تلوى نصيبه

بغيت أجنب عن هوى القلب وأعصاه
وعودت أطاوع ماخطر وأقتدي به

قلب ٍ يعرف الحق وشلون ننهاه
خله على مجراه يبد الرقيبه

في الضيق ياقل الرياجيل قلاه
وقت ٍ الرخى كل ٍ يعده مصيبه

فرق الرجال بموقف الضيق تلقاه
ومن إعتزى في الهيض لاتعتزي به

مغير حكي ٍ بين ذولا وذولاه
ومبالغ ٍ قوم النفاق إتحكي به

وحكي ٍ بلا فعل ٍ جلود ٍ إمبواه
ريش ٍ معاصير الهبوب تغدي به

عندي تجارب بأول الوقت وأتلاه
عرفت من نترك ومن ننتخي به

هذا كلامي وأوصل العلم لا أقصاه
وعمر يود العلم ذوق ويجي به

جعل الرخوم اليوم والصبح تفداه
وطيب ٍ على الجدان يعتز طيبه

تمت بجاه اللي عباده ترجاه
رب ٍ عباده كلها تلتجي به

© 2024 - موقع الشعر