الصقر عاد وعودة الصقر ياعبيد

لـ عبيد القلادي، ، في غير مُحدد، آخر تحديث

الصقر عاد وعودة الصقر ياعبيد - عبيد القلادي

الصقر عاد وعودة الصقر ياعبيد
يبغا رجالٍ تحتزم للمقانيص
 
والصيد مابه صيد يامدور الصيد
ماتحصل إلاّ جرة الثعل والنيص
 
لكن مكسبنا قروم الأواليد
اللي مثل شرواك من دون تخصيص
 
نبغا لنا رحله لحزم الجلاميد
الياسمعت أمر الوزارة بترخيص
 
ناخذ لنا أيام وليالي بتحديد
ونعود للأحباب بعد المقانيص
 
عبيدالله دعيع القلادي
ردي......................
 
يابن دعيع عودة الصقر ماتفيد
لاصار ماعندك هواية مقانيص
 
مابه حباري يابن دعيع ملابيد
ولابه اثر تتعب عليها القواصيص
 
ياما طوينا سود بيد الجراهيد
نصبح بلوقه والعصر وادي العيص
 
لولا الولع ما يتعبون الأواليد
بعض الهوايه ياولد لقطة غليص
 
راع المثل يقول لا تجيب النا العيد
اخلص وتنشب وأنت تبا المخاليص
 
اخير منها كشتةً كيف ماتريد
في روضٍ اخضر والزبيدي مفاليص
 
في جو هادي والمطر له تراديد
والسيل يجري بين حمر البراعيص
 
هذي حلاة العمر للعمر تجديد
والطير عندي ياولد ماهو رخيص
 
........................
عبيد دعيع القلادي
© 2024 - موقع الشعر