العيون الكحيله - أحمد الأسلمي

كنت أحسب إن حبه ليالي و أخليه
و ألقى مع الدنيا حبيب ٍ بديله

لقيت حبه بالمحاني مراسيه
حب ٍ تشيّد من ليالي طويله

صحيح لا قالو عذاب ٍ بتاليه
ول قالو العشاق دايم عليله

قفا و قلبي و المعاني تناديه
ابيه .. لكن ما لقيت الوسيله

من عقب ماني مهتني في تلاقيه
أصبحت أسامر وحدتي كلِ ليله

أسهر وطيفه لا حضر قمت أحييه
وأراقب المنشى مخيله مخيله

لا علها تمّطر دياره و أراضيه
ويذكّره صوت المطر في خليله

ياسِعد عيني كان أشوفه وأحاكيه
راع العيون الذابلات الكحيله

قولو له إني ناحلٍ من تجافيه
اما يجي ولا عيوني تجيله

© 2024 - موقع الشعر