أحدٍ ظروفه عن مرامه تحده

لـ يوسف بن محسن العضياني، ، في غير مُحدد، آخر تحديث

أحدٍ ظروفه عن مرامه تحده - يوسف بن محسن العضياني

ما دام كل جاب طيره وهدّه
يبغى العشاء لا شك به حق مشروع

أحدٍ يحد الجول طيره وهده
وأحدٍ يعوّد ما قطع طيره الجوع

هذي هي الدنيا قدايم وجِدّه
ما تستوي للخلق بالكم والنوع

من حد سلوى لين عرعر وجِدّه
وما بين صنعاء والدبادب وميقوع

أحدٍ طريقه سهلة مجرهدّه
وأحدٍ تعرض له كراظيم وسلوع

وأحدٍ تعرفه بيه من لون خده
وأحدٍ مغربل والزمن لايعه لوع

وأحدٍ ظروفه عن مرامه تحده
وأحدٍ ظروفه تُبّ لاكَن مصروع

خطوا الولد وان جاه في الوقت شده
يزداد طيبه طيب والراس مرفوع

من قال له تكفى سريعٍ مرده
بأبشر بعزك لو غدى الراس مقلوع

يوصف بسيفٍ يقصر الهرج حده
يقتص ما ناشه من أرقاب وضلوع

قرمٍ على كل المعاني تعده
يستاهل التمجيد مثني ومربوع

جِد الثمر يا زارع الزرع جِدِّه
الطيب من سالف بالأمداح متبوع

وخطوا الولد مسكين ضعفه يرده
عن ما يعز النفس بالضعف ممنوع

أدنات ما كاده وضامه وضده
ناعه ضعيف وقاصر الشبر والبوع

مثله نصيحه لا يغثّك تعده
لأنه دجاجه و الرجاء فيه مقطوع

ومن شان فعله عاش ما أحدٍ يوده
وأبعد عليه النِّعم من حبةالكوع

الشاعر /يوسف العضياني
© 2024 - موقع الشعر