أنا لي ثلاث ايام - ماجد العضياني

أنا لي ثلاث ايام عيا الضمير يهيد
تحوفه هواجيسٍ تقانب لها مدّه

هذا اول ليال العيد وأنا جنوب بعيد
عن اللي لهم في مهجة فوادي مودّه

سقاك الحيا يا دار فيها ربيت وليد
سقاك السحاب اللي زبر من بحر جدّه

سقتك المزون اللي شبك برقها شبك اييد
و غنّى رعدها فوق نجد وشبك مَدّه

سلامي على نجد العذية نهار العيد
سلامي على أرضٍ بالأجاويد ممتدّه

سلامي على دار الأماجيد والتمجيد
سنا مجد فيه ننزح الخصم ونضدّه

وإليها من الاشواق منّي قلادة جيد
وشعور أبدويٍ في طرف ذوده يودّه

ومن دون لاما نجد وأهله حدتنا البيد
ولو جيت ابا ام جناح ما روحت قدّه

وقفنا على الواجب حرارٍ ندر للصيد
تشوش الرؤس اليا اكفخت حزة الهدّه

يا سلمان عيا الوقت ياتي على ما اريد
لعبت الهجوم وجات هجمات مرتدّه

ورثت الهموم وكنني فالحياه وحيد
وكنيت شيٍ في ضميري عن البدّة

وجيه الليالي بيض تشبه وجيه الغيد
و مقابيلها ف نحور الأيام مسودّه

ملامح محاسنها على المهتوي تنكيد
تحت نابهاا ورده وفي حلقها غدّة

يا طيب الليال اللي ولدها رضيع الديد
ما قد لوّعت قلبه ولا شلهبت خدّه

ما شاف العجب في ساعة الكره والتنديد
و لا حس ّ فالغربه و هو في بني جدّه

ولا صافح من الود والجود والتحميد
غروب الرجال اللي على الضعف منحدّه

ولا واجه وجيهٍ غبرها علامة كيد
تكن الحسد وعروقهاا منه منسدّه

شريط الزمان يسجل بمكرته ويعيد
عجايب يردد صوتهاا من سمع ردّه

هذا الوقت يرفض سوقه الجمع والتفريد
تجرعت كاس من الحسايف على يدّه

خدمته وقدم لي فواتير للتسديد
وتعلمت منه دروس لو كان ما ودّه

ووقعت عقد التجربه قابل التمديد
وزهبت في دنيا العنا كامل العدّه

يا سلمان عاش اخوك فيها سوات الحيد
شجيعٍ على الهيجاء صبورٍ على الشدّة

ولد شايبٍ بالجود ذكره صداه يزيد
شنب مزحميٍ فالمزاحم ما احد قدّه

ابي منك تحليلاتك وعلمك الاكيد
ولن جيتني بالعلم لا ينكشف سدّه

من مميزات الكهرب مكيف التبريد
ومن كاتم الصوت الريموت ارفعه حدّه

بقايا الطفيليات ابا ارشهااا بمبييد
وبيت ٍ فتحته للمطاليق ما اهدّه

© 2024 - موقع الشعر