قصيدة حفل الأستاذ مهنا العتيبي - رائد العالي

ياالله يامن نلتجي له وندعيه
نرجيه من فضله ونخشى عذابه

ياواحد ما خاب منهو يناجيه
يجود بانعامه ويجزل ثوابه

يارب توفيقك وقصدي وماقيه
شي يجمل للصديق اعنى به

اما قصيد يشكر اللي يسويه
ولا ترى صمت الرجل من صوابه

والغالي اللي جابني علم داعية
افرح واقابل دعوته بالإجابه

يوم الوفا في سلمنا ما نخليه
والموقف الغصاب نحسب حسابه

بسم الرفيق اللي تنومس مباديه
واسم هل المحفل وكل القرابة

يامرحبا ترحيب غالي لغاليه
اللي لفا بالحفل يامرحبا به

لكل ضيف نقول يالله تحييه
اقولها والي الشرف بالنيابة

في محفل مهنا عسى الله يهنيه
ونايف عسى الفرحة تخاوي جنابه

مبروك من قلب يترجم معانيه
باعذب تعابير الغلا في كتابه

رفيقنا نتعب عشانه ونوفيه
لجله طريق الكايده مانهابه

واللي معاريفه علينا نجازيه
حيث ان راع الطيب يلقى الجزا به

الله يبارك بالكريم ومساعيه
قرم عن اهل الطيب ماصك بابه

عز الصديق وعز منهو يخاويه
على المعزه والوفا والرحابه

جعل السعاده في حياته تماشيه
في كل دار وجهت له ركابه

مبروك لمهنا عسى الله يهنيه
ونايف عسى الفرحه تخاوي جنابه

© 2024 - موقع الشعر