إلحق ولملم ما بقى من بواقي - حسين العسيري

دامك على حبي حريصٍ وباقي
................... خل الجهاله وإنضبط واسمع الشور
 
 
 
خلك على درب السنع والرواقي
.................. وارحم فؤادٍ في الهوا عايش الدور
 
 
 
لا تسمع لناسٍ تهد السواقي
.................. ناسٍ هواها كلمة الكذب والزور
 
 
 
إسمع لقلبٍ عايشٍ في إحتراقي
...................جاه العنا مع زايد الهم موفور
 
 
 
توي أفكر في سبيل التلاقي
...................رجّعت لي قلبي متيم ومدحور
 
 
 
ياما حلمت بضمتك والعناقي
...................وياما كتبت اشعار وابيات وبحور
 
 
 
ودي تحس بلوعتي وإشتياقي
....................ودي تحس إشلون لاصرت مأسور
 
 
 
لو أيش ما تطلب تمون وتلاقي
..................... إسمك( أمل )في داخل القلب محفور
 
 
 
لو تآمري سقنا جميع النياقي
...................والا هجرنا الناس والأهل والدور
 
 
ولو تطلبي جيتك على عقب ساقي
................. ما همني بعد المسافات والبور
 
 
 
إلحق ولملم ما بقى من بواقي
....................وإن كان ما تبغا ترا منت مجبور
 
 
 
لكن طلبتك ياحسين الرقاقي
.....................إنثر على قبري ورودٍ وكافور
© 2024 - موقع الشعر