اذا قد مت .. هل بعدي بتعشق حد يالغالي .؟

بصدفه يوم الاثنين المسا قد دق جوالي ..
وكان المتصل محبوب قلبي لي يواسيني ..

بدأ هو بالسلام وقال دمع العين همالي ..
سهير الطرف و الضيقه تناديني تناديني ..

و رديت السلام وقلت يا ليتك ترى حالي ..
تليف الحال متكدر مثل حال المساجيني ..

وقال ابات ساهر استمع لأقوال عذالي ..
يقولوا صرت تنسى من انا يغلى مضانيني ..

واسال دايما نجم الدجى هذاك و التالي ..
عسى المظنون يعشقني مثل اول و يغليني ..

ومشغلني سؤالن دوم هو يخطر على بالي ..
وانته قول لي ايش الاجابه يا نظر عيني ..

اذا قد مت .. هل بعدي بتعشق حد يالغالي .؟
وتنسى حبنا و العهد و اللي بينك و بيني ..

تطمن قلت له و اعيش انا من دونك محالي ..
وما بنساك لو حتى فؤادك كان ناسيني ..

احبك .. والشقا منك ، احبك .. والجفا طالي .!
احبك .. وانت تلعب بي وبصدودك تجازيني .!

احبك .. وانت غايب بين ربعك والاهل سالي ..
ولا تسال عليّه يا مليك الحسن والزيني .!

رغم كل العذاب وفوق هذا .. القلب لا زالي ..
مولع فيك مغرم ما يبي غيرك يخاويني .!

عسى رب المخاليق الكبير الواحد العالي ..
يطول عمرك و يحفظ شبابك يا مجافيني ..

و ويلي آه لو قد مت .. وش بتكون احوالي ..
ملل مع ضيق مع نيران وسط الجوف تكويني ..

و بعيش العمر في نون ثم الكاف و الدالي ..
و ببقى ساهراً مع ذكرياتك لي تبكيني ..

حلفت اني اصون العهد ياللي لك قدر عالي ..
وبتمسك بحبك والوفا هو مني و فيني ..