على مهلك ..1 - وليد المري

على مهلك مدام انك لفيتيني بها الليله
امانه ما بقيت اقوى من الدنيا الم واوجاع

اشوفك نافضه ريشك وبردك حازمن حيله
وانا ضلعي لو ايحوفه قليل من الحراره ماع

امانه سايسي قلبن طرق في جيتك شيله
على بحر المريض اللي خلط مع توته النعناع

من اقبلتي وانا صوتي يشيل الحرف من ذيله
واخاف تزل بي حروفي وابايع في الوقيه صاع

شعورن غايتي اقدر مع الايام تحليله
احس بضعف من يقوى على ما يضعفه وارتاع

الا يارب ياللي صعب نلقى غير نشكي له
ونشكي له من اللي صعب تتبدل به الاوضاع

انا من ليلة البارح وليفي ما فزع خيله
وانا خبري الى من طحت هم وقام لي فزاع

وانا اذكر كل ما هم وفزع وانعفست الشيله
يذوب الليل في وجه القمر وآصير به طماع

الا يا حلم والواقع سؤالٍ صعب تعليله
تحقق بس هالمره ترى حلم الظلام شعاع

حقيقه تنثر دموعي على فرقاه وادعي له
ولا حلمن يغلبني على ميصالنا اللي ضاع !

كثير من البشر تنسى عذاب الجرح وتزيله
وانا جرحي مع الايام يصبح للأسف لذاع !!

© 2024 - موقع الشعر