يا جو ,, يا بيداء ,, يا ظهر السفينه - عبدالله الفهيدي

المنوه اللي دونها سيف معناي
وخرس الحروف المبهمات الدفينه

ردت على قلبي مسافات دنياي
لأمان من وقتي ولا من سكينه

حانة سكارى الليل غنت بمغناي
وعادت به اعقول السكارى رزينه

هذا من الدنيا على أطراف ذكراي
وغيره من الذكرى يكظ السجينه

غربه على كربه على منت وياي
بُعد السماء السابع عن تراب لينه

مما تشيل النفس من كايد اخطاي
هونتها وهانت و للصعب حينه

حان الوداع وجدد الوقت مسراي
يالله فمان الله يا اهل المدينه

ساق القدر ياعزة النفس فرقاي
والله عليم الحال والله عوينه

يمناك يا دربي وانا امد يمناي
يا جو يا بيداء يا ظهر السفينه

الله ولا علم(ن) يشمت بي اعداي
والله ولا موت القهر و الغبينه

ماجابني وقتي من اقصاي لأقصاي
إلا قبل يرتد طرفي إل/عينه

لولا ان له سر(ن) عن الناس باحماي
لأفتل احبال معقدات(ن) متينه

واعلم اللي جاهل(ن) عن سواياي
واشلون يدري كيف ويني ووينه

أما يجي بالسلم شفي و رجواي
وإلا إنها الغدرى وبيني وبينه

فعل الشجاع وخوة الذيب والراي
وامصقلات و مسرجات(ن) ثمينه

كسب اليمين و ورث جدي ومبداي
ما دون حلق الرجل إلا يدينه

أصبر على عوج الليالي وبلواي
واللي يسار الدرب واللي يمينه

يا عنك ذات الطيب ذاتي وعرقاي
و كنز الفتى للجدْ بأول سنينه

قبلت وسم (ن) له على عز مجناي
وكل(ن) يدور من يقبل جبينه

يانفس انا حقي على شف سلواي
وانتي بعد حقي وحقك تبينه

غنوا على ( اليمال ) عشاقة الناي
وانتي على اليمال ما تعشقينه

غني على بحرك وموجك ومرساي
دام الوداع اليوم لأهل المدينه

ما همني دربي ولو طال ممشاي
حالي مثال أهل النفوس الحزينه

© 2024 - موقع الشعر