قصيدة بمناسبة فوز ابل غازي العضياني - محماس العضياني

جاك العمود اللي على مرع الارقاب
وضح منافسها يرقم وراها

وضحٍ وسمناها بعد وسم الاجناب
بالله ثم من قال مالي فداها

الرقم الاول مالها عنه مجناب
والخصم يقصر دونها لو بغاها

يوم استعدت وارهبت خصمها ارهاب
جوها اللجان وقررو مستواها

شهر لها الجمهور باصوات الاعجاب
عسى الكريم من الحسود يحماها

في وصفها مايبدع القاف لو شاب
الله لجزلات المزايا عطاها

وضحٍ تلاهق كنها المزن سكاب
هنف قرايع من يجيد مغزاها

فيها الطبايع يستثيرن الالباب
لوقدمها بدروم جات بعصاها

والروس روس جمال والوصف جذاب
منين ماعاينت ضافن حلاها

هيم البطون ظهوروها يم الاعقاب
من المرادف مستقلن قراها

هزع المواخر جرد الارقاب واشباب
سند غواربها وخطل يداها

حاشولها ربعٍ يجيدون الاسباب
ومن نظرته يم المعالي لقاها

ربع لهم فالطيب ماكر ومقضاب
من ابوعتيق والوريث احتماها

يابوندى مبروك يازاكي الانساب
ياطيب الرفقه ومنهل وفاها

تستاهل التمجيد والكيف لك طاب
وراعي فعول الطيب يلقا جزاها

ونثني لابوسلطان تقدير واعجاب
اللي بعد زود المساوم شراها

دفع بها من حر ماله ولاهاب
ونفسه بقو العزم حقق مناها

سعد سعد رام المعالي والاصعاب
بالهمه العليا شهر واحتواها

والقرم ابوفواز يحسبله حساب
وقف لها بين الخصوم ونقاها

قلته وانا واهل الوفا عين واهداب
والكل من روسِ يذري ذراها

ربع لهم تاريخ يرغب وينهاب
عضيان يوم المعضلات وغثاها

يوم السنين مفرقت شمل الاحباب
تهاب صولات القبايل حماها

ماهم عن نطح المهمات هيباب
عراف عقالٍ بعيد مداها

وان جت بهم سرد الكراديس هراب
ياقرد حظ اللي يجي في نحاها

وان قررت زود الفعول ام غصاب
تكسب جبرها الطايله واومراها

في راي اهل سيف للارقاب قصاب
عمهوج كم قوم بحده رزاها

والطيب قدم مدورينه له ابواب
والمرجله ماحدٍ عن احدِ حماها

ماهوب فالموقف بضاعه وجلاب
من ذلل أسباب الطويله رقاها

ماحدٍ يطب الملعبه غير لعاب
وفعايل أهل الطيب ماحدٍ رفاها

تمت بذكر المعتلي رب الارباب
طرايف ماقلتها ارجي جزاها

وصلاة ربي عد ماهل سكاب
على الشفيع اختم بها منتهاها

© 2024 - موقع الشعر