ان بغيتوا تفلحون - مانع بن شلحاط

يا عرب والله مابه دون معنى الهون هون
لا رضيتوا بالمذله ما على الدنيا طراه

افزعوا يا ربكم لا من فزعتوا تسلمون
من عذاب الله دام انه وضع طوق النجاه

ليتكم في كل ليله تركعون وتسجدون
وتطلبون اللي يجيب الداعي ليا من دعاه

الكريم الواحد الفرد الصمد .. لو تذكرون؟
وش يقول ( المصطفى ) في اللي تفلّس في الحياه

ماله الا النار تاكل كل شكل وكل لون
افزعوا يا مسلمين الله .. ترى ما به سواه

وش لقيتوا من زمنكم غير تجديد الديون
فقر دين وفقر فالدنيا ولا شفتوا غناه

وكل بلدان العرب تنهب تحت مرأى العيون
وان سمعتوا شي يذكر راح من عنده وراه

والجماعه كل ابوهم ينظرون ويسمعون
بس ما في اليد حيله وش يفيد الانتباه

غير لا منا رجعنا للحقيقه وش تكون
مابه الا الدين يدعيكم وبذيتوا خفاه

كل ليه .. تسهرون وتبسطون وتلعبون
بنت هاس وبنت ديمن .. دق عود .. وما سواه

والرجل زيّن حياته .. فيه مال وبه بنون
بس طاري الباقيات الصالحات أصلاً نساه؟؟

وش نقول و وش نخلي .. ياعرب لو تفهون
الحياه تمر وبسرعه .. وتاليها الفناه

ان بغيتوا .. تَصلحون وتِصلحون وتِفلحون
اتركوا كل السوااالف ... و (( الله الله في الصلاه ))

© 2024 - موقع الشعر