شجاع لكن - عبدالله بن راجس

تصبري يا عين لو ضامك السهر
من طاري الفرقا ترى النفس ذابله

شوفي مقابيلك ترى مقفي الدهر
بعد ذهابه مستحيل الإياب له

يا عين شوفي حالتي قد لها شهر
مثل الذي يدعي ولا يستجاب له

سهران بلحاله وقدامه القهر
مقابله ,, لو كان ما هوب قابله

وجدي على الممشى بروضٍ من الزهر
ممطورٍ أمس ولا بعد جفّ وابله

لاركت عليه الشمس في حزّة الظهر
فاحت نواويره وغنّت بلابله

شعيبه الفايض تشوفه كما النهر
والعشب نبته ما تعلّت سنابله

لو فيه يمشي شايبٍ محني الظهر
ساعة زمن يمكن تعيد الشباب له

يا عين بعض النور بالعين لو جهر
عندي حضوره ما استوى والغياب له

يا حظ من هو فعله الطيب اشتهر
ويا حظ من هو طيب الحظ طاب له

وعزّي لمن فعله مع الناس ما ظهر
شجاع لكن جور الايام هابله

© 2024 - موقع الشعر