اخذيني

لـ سعد علوش، ، في غير مُحدد

اخذيني - سعد علوش

أخذيني إليا عجبتك بس ردينيي
وأن ماعجبتك خلاص أخذيني مابيني

مادامني شفت فيك الطهر والعفة
باعيف نفسي ليا منك كرهتيني

أخذيني لو أعتبر من ضمن أشيائك
وأنا بحبك ولا لازم تحبيني

لا بي علاقة ولا نظرة وبسمة
أحساسي أني بقربك بس يكفيني

ولو أني انضفت لشيائك غصب عنك
طلي علي ياغناتي لا تخليني

تراي لاجا المصامد ماني بهين
تقول كن العرب لعبة بيديني

شخصيتي من غرابتها وطيبتها
كن الزمن في تحدي بينه وبيني

أخذيني الشاعر اللي ماصدق حظه
لا قلت ياحظ وينك ؟ قال : ياويني

أخذيني المبدع المتفلسف التحفه
مؤمن وتضحك على العالم شياطيني

شهرة شكسبير وأفلاطون ونيوتن
لا قلتلي بيت شعر .. تطيح من عيني

أخذيني العنصر الي صدق متعنصر
من دون ربعي لو أقطع شراييني

أخذيني اللي ليا منه طلب يعطا
وتكفين لا من طلبتك لا ترديني

تكفين ياغايتي يابهجة الدنيا
أبحرق قلوب ناس ماتدانيني

أخذيني بكل شوق وقولي أحبه
وأن شككوا فيك .. و إلا في .. ضميني

قولي سعد والله أنه غالي جدا
وياجعل فدوة شبابي واخر سنيني

وأنا بصدق كلامك وأعتنز بالله
وباقول للناس مايعنيك يعنيني

وأنا علي نذر ما أرخص جيتك
وأنتي نذر على أرقبتك أنك ماتخليني

تمت الإضافة بواسطة :فهد الخرجي
© 2024 - موقع الشعر