الله مااغرب هالزمن وش كثر مابه من صروف= تزايدت غرايبه وكل يوم نشوفها

من بعدما كل غدا على خطى اللذة لهوف=وخذا بجداره مركزه الاول مابين صفوفها

حتى البنات اتفنن بالكذب وانواع الحلوف=واتفنن بالخايبة مستورها ومكشوفها

وحدة على قلوب البشر تلعب عليهم ماتروف=وفي قلبها تجمعوا أحبابها وضيوفها

احد في ظل المصلحة تاخذ منه بلاعزوف= والثاني له كل الغلا وهو اللي ساكن جوفها

والثالث لوقت الفراغ توفّره بلاحسوف=وتبدل اللي ماتبي منهم مثل نفنوفها

وهذي تسوي شعرها قصة ولد فوق الكتوف= مسترجلة في مشيها وفي هزها لكتوفها

وهذي بهذي معجبة والقلب ملحقته كلوف= والى اختلوا ماخافوا الله والفتن وسيوفها

وهذي تعسل شيشة دخانها يوذي الانوف =وهذي تكشف وجهها وتبدي دقاق وصوفها

وهذي على درب الخطا تعصي الولي الرب العطوف=تكبر ويكبر همها والحسرة اللي بجوفها

وهذي بقناوات الفضا تهدي مشاعر بالألوف=تهدي عبث تهدي عفن ويدينها بدفوفها

وهذي على الرادو تجي وتتغنج بصوت رهوف= ويخضع لها المريض واللي ماحسب لحسوفها

وهذي بروايات المجون تضلل قلوب الضعوف=وبكل اذاعة او قناة اتخيلها وتشوفها

خدعوها هاللي صفقوا لها براحات الكفوف= ماهمهم لافكرها لانثرها لاحروفها

وهذي تجاور الرجال بالأمسيات بلاكسوف= محد منعها لاأهل لادينها لاظروفها

يرتاح قلبي لمسلمة بالكعبة الشما تطوف = وتسجد وتركع للولي وترفع رهيف كفوفها

مالبست الحشمة ولا الحجاب لعيون الظروف= لبسته تطمع بالأجر وان الله يرحم خوفها

وترجي من الله رحمته والعفو في يوم الوقوف=وتذكره وتراقبه في جلوسها ووقوفها

واناادعي الله واطلبه سبحانه البر الرؤوف= لنا الهداية والجنان الدانيات قطوفها