رد شاعرنا على قصيدة متعب السعيد:
البارحه نومي عن الجفن شراد = ياحيف ياعينن منامك نكاده
أول نهاري بين نازل وصعاد = كسرت دعسات الدرج بالرداده
والظهر كنى في لظا الشمس قعاد = ومكيفي ما سرني في براده
والعصر بالموتر مشاويرن ابداد = اسوق كني جاهلن بالقياده
قالوا علامك بين ناشد ونشاد = مكلوف وإلا مكلفن بالنشاده
قلت اتركوني يصنع الله ماراد = كفو لغاكم عن كلام الزياده
متعب يبي النجده وينخا بالانجاد = خيم عليه الحب والحب صاده
يكشي علي من العنا عقب الأسعاد = مجبور في طفل مشافي عناده
ماني من اللي يلزم الصمت بحياد = يوم الحمايا ما يشرر زناده
والله لفزع له على روس الاشهاد = بالسلم وإلا في حروب الاباده
في خدمته لاقف على كل مرصاد = واقوم واقعد لو فراشي كداده
لو حطني مثل الطويسه وشداد = من سبته فارس تحصل هجاده
وانا مال لومه في هوى غض الانهاد = واللي يولمه جاهل في مهاده
الحب مايمتعب مساميره حداد = وإليا سمر بالقلب يرث بياده
حب العذارا يابن عثمان جلاد = ما فادني قبلك طبيب العياده
هجرت ديواني وربعي والاحفاد = كله سبايب لابسات القلاده
عشرين عام بين صادر ووارد = كم زارع زرعه سعيت بحصاده
ومن المها صدنا جماعات وافراد = يوم الردى يفرح بصيد الجراده
ترى الهوى والطيب من سلم الامجاد = حب النشاما للعذارى مجاده
راعيه ما يشناك لو كان نقاد = يشناك خبل ما ركب في شداده
والهقوة ان صويحبك منزله غاد = وراك وانته في حراوي بلاده
انخ السكارى يوم ضدات الاضداد = لطامة العايل نهار الطراده
وانا عوينك واعتبرني لك سناد = قول بلا فعل قليل مزاده
وان كبرت القاله لنادى بعباد = واطش عن راسي جديد الصماده
ندوس نار الحرب لو توقد اوقاد = اما عمار العمر وإلا نفاده
واسلم وسلم لي على كل قصاد = وحتى على اللي ما يعرف القصاده
سلام احلا من لبن شقح الاذواد = واطيب من العنبر وصافي زباده