جواب "الظمني" على الشاعر مناحي بن شاهر:
خط لفاني له مقام وتوجيب = يامرحبا بالخط واللي لفابه
مافيه لا زله ولا فيه تعتيب = مافيه ياكود السلام وهلابه
من شاعر معروف بين اللواعيب = مثل البحر يصفق على من مشابه
ياراكب اللي ما تمر المناصيب = طريقها بين السما والسحابه
طيارة فرت سريع اللواليب = من صنع روسي نصيبه سعابه
ما قالوا السواق يحتاج تدريب = مدرب والجو ياخذ حسابه
تسبق صواريخ مشت بالتجاريب = أربع ثواني ياصل اللي نوابه
من دار أخو مريم مهدي الأصاعيب = دار الصباح أهل الكرم والمهابه
مرواحك الظهران مامن تجانيب = ديرة هل العوجا حمات الضبابه
ملفاك ابن شاهر سريع التناديب = يفرح إليا شاف المسير نصابه
مايذبح إلا من كبار المقاضيب = ولاجاب للضيفان كيلو قاصبه
قله معي مكتوب مردود ماجيب = قبل يفكه عارف ما انطوابه
جانا كتابك ياعشير الرعابيب = واللي يعمل الخير يلقا ثوابه
تشكي من الدنيا سهوم معاطيب = وتقول وقت ما هبابي هبابه
يا مناحي اصبر والفلك له تقاليب = ما قدر الباري على العبد صابه
دنياك ما تضرب بروس المشاعيب = يوم لنا ويوم علينا انقلابه
عينت ابن شداد والزير وكليب = وذياب وابوزيد راحو نهابه
والذيب ما عشاه كثر التقانيب = وإليا قنب صوته تنابح كلابه
والطيب بين الناس قسمه وتوهيب = كلن على قده يفصل ثيابه
الحر ميقاعه بروس المراقيب = والبوم بين العرفجه والخصابه
ولاينفع الميت كثير التطابيب = ولا يسقى العطشان طافح سرابه
ولا يقطع الفرجه ردى المصاليب = ولا خاشر الضواى راعي الكسابه
ولا كل طرقى لقاله معازيب = ولا كل من دور ذهيب حضابه
ولا كل من شال التفق قالوا يصيب = ولا كل من غنا يجر الربابه
ولا كل من جامع هل الدين خطيب = ولا كل قارى تستمع في خطابه
والحرمله تمطر عليها السحاحيب = والمر فيها ما تغير عيابه
وبعض العرب ناشي على فرية الجيب = لا نافع ربعه ولا منه ثابه
تلقاه بين الناس يرمي المشاهيب = خايب ولا يغوى دروب الخيابه
ماله جدا ياكود حش العراقيب = دايم على المقفى سريع الهذابه
وصلوا على اللي طنب الدين تطنيب = نبينا اللي من يضيع اقتدابه