جواب شاعرنا الظمني على الشاعر فرحان الزعبي: هي الجواب اللي لفاني محرر = من شاعرن منه المعاني جسامي مثايله مثل الذهب ويتجوهر = يشري غواليهن إليا منه سامي شاعر وفي صعبات الأمثال يصخر = يسوقهن سوقن وفيه انسجامي قرم إلى جيته يرحب ويشهر = له فزتن تشدي لحرن قطامي تلقا النشاما دوم عنده تحاضر = لا طال بعض الشرح عند الخصامي يصيح لي بالصوت والصوت غور = والحب بحرن وسطه الموج عامي من صيحته مشغول والفكر ماقر = تايه مع الأفكار شامن ويامي سهرت لين اصبحت والفجر نور = كنى قريص عالقه سم هامي لولاي أجاحد عبرتي لا تفجر = تفجير صاروخ يديره طغامي عليه رواد الفضا يوم ثور = خلا سفينتهم تشق الكتامي يوم انطلق من مصنعه ما تقهقر = ساقه على الذره قليل الرحامي اقفت بهم بلوا تعر السماعر = وغدا لها بين النجوم انحطامي اسباب مكتوبن لفاني معبر = ساعت قريته قمت أعض البهامي يشكي به الزعبي عذابن مقدر = يشكي صوابه من فراق الليامي والله مالومه لو ضميره تكسر = من حيث طراد الهوى ما يلامي ياويل من جرحه عليهن تطور = يصعب دواه إليا طواه السقامي من ذاق حب اللي خديده مقمر = يعوي عوى ذيبن حدته الحوامي ذيبن حداه الجوع والوقت مغبر = وخوفه عن سمر الأنعاج رامي معذبه ليل اشتا ويتجضور = وإليا قنب جاللضلوع انهشامي من حبها فرحان قام يتخفر = تخفر المقهور يوم الزحامي صكوا عليه عداه وقلوبهم شر = تواردوه مطرفين الحسامي فرحان يشكي لي وانا له مسير = بالمال واليمنى حشا مايضامي ان كانها بالمال ندفع ونفخر = وانخا بني عمي خوال وعمامي فرحان انا مما جرالك مكدر = شكواك خلتني كثير الوهامي مدري بلاك العشق وإلا تعسر = ادخل على الله لاتجي لي زيامي تراي من كثر الغرابيل مجهر = قضيت عمري تايهن مع حلامي دنيا تسوي لك عقب حلوها مر = عقب العسل تسقيك مرن جلامي ان طعتني خل الهوى لا تدهور = ياكثر ما خلوه ناس فهامي عند البداية كنه الروض الأخضر = ونهايته وقتن نباته رمامي قدامنا خلوه ربعن مسطر = عقبان نجد مهيجين العسامي |
||||||
| vists | copyrights slogon | online crap |