إلى الشاعر طلال السعيد:
لولا الحيا لصيح خمسين صيحه = صيحة يتيمن ضايمينه عمامه
ابوه ما بين التصايب سديحه = وامه توفت قبل يبلغ فطامه
وإلا كسيرن طاح وابطا مطيحه = بالمعركه راحت شظايا عظامه
يبي الحياة وشاف روحه ذبيحه = تذكر الفرقا وزاد انحطامه
على عشيرن منه روحي جريحه = جرح على ماقيل طالت سقامه
الصاحب اللي ما مشا بالفضيحة = من طلعته ماداس درب الملامه
قلبي يحبه والمحبه صريحه = حب الغلا ماهي محبة غشامه
عينه تراعيني ونفسه شحيحه = وإليا صدفني عض سنه ابهامه
وإليا تكلم بالثمان الفصحيه = يا سحر قلبي من حلاوة كلامه
ياعود ريحانن جذبني بريحه = سقاه من نو الثريا غمامه
سقاه من نو الثريا رويحه = مزنن من القبله نشا بالتحامه
هبت له الغربي ولقح لقيحه = ودارت له الشرقي وبنا خيامه
ما انساك يارع العلوم المليحه = كود العرب تنسا ليالي صيامه
يالايمي صاحت عليك النويحه = وإلا تواجه في حياتك ندامه
وين النشاما اهل الوجيه الفليحه = لباسة المرعز حماة الجهامه
اشكي على اللي ما يكيده نطيحه = طلال شوق اللي جديد وشامه
تكفا يابن عثمان زاهي مديحه = ما لذلي حلو الكرى مع طعامه
قلبي عليها مثل عيدان شيحه = وإلا حصاد في ليالي صرامه
جسمي تفلش والقوايم طريحه = سكراب بدين كسر الورع جامه
واعرف ترا ماني مدور نصيحه = ولا داني الفراع يوم الزحامه
وان ما فزعتم قولوا الله يبيحه = راع الهوى قامت عليه القيامه
***