إلى الشاعر مرشد البذال..:
هات القلم ياكاتبين الاساطير = يازين في نظم المثايل قلمها
واكتب إلى مرشد كبير الشواعير = اللي إلى جات المثايل خصمها
أبو عبيد بالليال المعاسير = ذباح حيل ينتوصف شحمها
يا بوعبيد ما تفيد المعاذير = ابديت لك شكواي وانت استلمها
كلن رقد وانا عيوني مساهير = والعين ربي من منامي حرمها
يا تل قلبي تل دلو على بير = من عالي الطيه تقطع وذمها
تقطعت من عاليات النواعير = واللي على الطيه غفل مالزمها
والكبد مني كن فيها مسامير = والما ليا منى شربته لطمها
جيت الطيب وقال مامن تباصير = كبدك عليله ما عرفنا سقمها
وطلبت ياخذ بالاشعه تصاوير = عشرين صوره علتي ما رسمها
ورجعت يم البيت من غير تفكير = ورجلي عن الممشا تغير قدمها
ونطحني الجاهل وهو عمره صغير = عامين وايضا ماكمل في فطمها
يقول يا بابا وانا اقول يا خير = وكنه يحاكيني برطنة عجمها
وأثر السبب غرو نهوده مزابير = الصاحب اللي بالموده وسمها
إليا نظرني بالعيون المخادير = منى معاليق الضماير صرمها
اشوف بعيونه سوات الطوابير = بيوم احتفال وارفعين علمها
وإليا تضحك بالثمان المغاتير = كن الجواهر في شفافه نظمها
بنت الرجال اللي تفك المعاشير = زبن الدخيل إليا تعاقب سهمها
وصلاة ربي عد ما غرهد الطير = على نبي كلمة الله ختهما