يذكر بها الشعراء: محمد بن خلف الخس
وصحن ابن قويعان وسعود بن ثويران المطيري
ومحمد بن هادي النمران الرشيدي *:
الله من قلبن همومه حدنه = كنه يسمر في ضلوعه مسامير
ياطارقن نجر الهوى لا تدنه = جورك عليه يكسر القلب تكسير
تبحث خفا نفسن زعلها تكنه = من ضميها قلت عليها التباصير
ياعزتي لسعود من كبر سنه = عنه انتحا عصر الصبا والغنادير
فيما مضى غيد الصبايا يبنه = واليوم ماله من وراهن مشاوير
حتى ابن هادي بالعيون حربنه = تغيرت لفتاتهن والمظاهير
ماكنهن عقب الغلا يعرفنه = راحن على ريف النشاما مناكير
والخس في قلبه من الحب لنه = مركز دفاعه بين هدمن وتعمير
وإليا نشدته قال قلبي خذنه = يامن ذكر لي وردهن والمصادير
وصحن إليا شفته مع النس كنه = بين الرجا والياس يرسل مداوير
يطحن غرامه والهموم اطحننه = يشكي على دبيان بعض التدابير
اقفا جديد العمر مافيه منه = اقفاي عشب جاه صيف ومعاصير
كنت مزونه والسمايم شونه = وابعد ثراه ويبسن النواوير
ليت الليالي ماخذن رجعنه = ينشاف زمل مدوجرات البواصير
يوم الحطب بحبالهن يجمعنه = بين الفياض وسانحات الدواوير
راع الهوى لو مايجيهن يجنه = الشك زايل والطوارف مسايير
وإليا لفاهن طارش ينشدنه = عينت ماعينت من غير تقصير
وإليا تلافن من ربيعن قضنه = تقبلن مقطانهن بالتباشير
والعصر غالي لبسهن ينشرنه = بين البيوت وبين ورادت البير
يازين صب الدلو بقدورهنه = قدام تروى مرزمات المعاشير
مافيه رادو بالغنا يسمعنه = ولا جهازن يختلف بالتصاوير
بس المدوه يوم للبوش حنه = وقولت ياراعي السانيه بالمحادير
راع المحبه بالنظر يشغلنه = تنشق دلوه بين روس النواعير
كم عاشقن بعيونهن صوبنه = ومعكرشن فوق الردايف دعاثير
على العبس ومن الشمطري غذنه = ما قصصوهن عاملين الكوافير
واليوم وقتن يوذي الناس فنه = عشق الهواتف والصور والمزامير
وسعود صاح وتالي الصوت ونه = ومحمد أخفا صيحته بالمعاذير
وابو خلف عجف السنين محننه = يومين وإلا يذكر البيض بالخير
طشو كلايف جيشهم والاعنه = ماعاد قالوا درجوهن مغاوير
يارب بدل نار الايام جنه = واغفر ذنوب اهل الوجوه المسافير
***